World Rabies Day gisaulog sa Ozamiz

Ang City Veterinary Office sa dakbayan sa Ozamiz nagpahigayon ug 2-day mass castration ug anti-rabies vaccination sa mga iro ug iring sa Barangay Pantaon ug sa Brgy. Bañadero.

Ang Septiyembre 28, 2022 nagtimaan sa ika-16 nga World Rabies Day uban sa tema nga 'Rabies: One Health, Zero Deaths' nga nagpasiugda sa koneksyon sa kinaiyahan sa mga tawo ug mga hayop.

Tungod niini ang LGU-Ozamiz ubos sa pagdumala ni Mayor Henry “Indy” Oaminal nagmando sa buhatan sa City Veterinary pinaagi ni City Vet Dr. Evelyn Sunico nga pakusgan pa ang rabies control and pet protection program sa siyudad, Septyembre 28, sa pagsaulog sa World Rabies Day.

Gipahayag usab ni City Vet IV Dr. Lordius Caliao ang kaimportante nga masayod ang katawhan kung unsa ka-delikado ang rabies. Walay tambal ug makamatay kung mapasagdan. Tungod niini, gipakusgan ang rabies control and pet protection program sa siyudad.

Una pa niini, nagpahigayon usab sila sa anti-rabies vaccination ug deworming sa matag barangay sa dakbayan tungod kay gusto ni Mayor Indy nga mas mapakusgan pa ang rabies control and eradication program sa Ozamiz ug mahatagan usab ug kasegurohan ang mga mag-uuma nga anaa sa maayong panglawas ang ilang mga buhing baka, kabaw ug kanding.(AONC/SMRN)

more photos: