Malnutrition sa mga kabataan sa Ozamiz, Solusyonan

Ang Department of Science and Technology (DOST) Food and Nutrition Research Institute sa pagpanguna ni DOST Misamis Occidental Provincial Director Eufresnie Ann D. Simbajon nibisita sa Ozamiz City alang sa Technology Transfer Training sa dugang duha ka mga produkto nga i-produce sa Ozamiz City Complementary Food Facility.

Ang dakbayan sa Ozamiz ang nahimong beneficiary sa Malnutrition Reduction Program sa DOST Food and Nutrition Research Institute nga nagtumong sa paghatag solusyon sa malnutrisyon sa mga kabataan nga nag-edad 6 months to 59 months old.

Tuig 2016 dihang unang nakadawat ang Ozamiz sa mga equipment alang sa complimentary food production nga miresulta sa produksyon sa rice mongo sesame food blend ug rice mongo crunch.

Bisan naundang ang operation sa facility tungod sa renovation sa building niini ug naabtan usab sa pandemic, nakita sa DOST nga maayo ang dagan niini ug tungod kay anaa na sa alert level 1 status ang dakbayan, gihatagan na ni Mayor Henry “Indy” Oaminal sa go signal ang pag-operate pagbalik sa facility dili lamang aron sa pag-address sa malnutrition problem sa mga kabataan apan usab makahatag dugang income sa dakbayan ilabina kay upat na ka mga products ang ma-produce sa facility.

Sa tibuok region 10, tulo lamang ka mga syudad ang may complimentary food production facilities, duha niini ang anaa sa Cagayan de Oro City ug usa ang ania sa Ozamiz.

Nibisita usab ang DOST Food and Nutrition Research Institute aron sa pag-conduct ug 3-day training sa paghimo sa mga food products ug aduna usab mga technicians nga mo-install ug mo-check sa mga equipments. Gikan sa duha, upat na unya ka complimentary food products ang i-produce sa Ozamiz City. (AONC/SMRN)