Top 5 target list sa PNP ug PDEA patay atol sa buy bust operation

Usa ka drug buy bust operation ang gipahigayon sa mga Kapulisan sa lungsod sa Plaridel Misamis Occidental inubanan sa mga tropa sa Provincial Drug Enforcement Unit kon PDEU na gipahigayon sa maong lungsod. (Jun Datulayta)

Nahulog sa pinusilay ang gipahigayon nga joint buy bust operation sa kapulisan didto sa lungsod sa Purok 7, Barangay Southern Looc lungsod sa Plaridel alas 11 sa buntag niadtong Hunyo 18, 2022.

Kini human namatikdan sa target nga si Fernando Gabisan hamtong ang panuigon taga dakbayan sa Ozamiz ug temporaryong nagpuyo sa nahisgutang lugar ang presensya sa mga pulis nga mihimo sa maong operasyon ug matud pa nakigpinusilay kini sa mga kapulisan hinungdan sa pagbalos sa mga sakop sa otoridad

Nakaangkon ug samad pinusilan ang suspetsado ug dali nga gidala sa tambalanan ang maong suspetsado apan gideklara kining dead on arrival sa doktor.

Napalit gikan sa suspetsado ang usa ka sachet sa shabu samtang nakuha sa posisyon niini ang laing 4 ka sachet diin gibana-bana nga nagkantidad kini ug P5,440 ug pusil nga gipanag-iya niini.

Kauban sa Plaridel PNP sa pagpanguna ni Police Major James Daleon hepe sa Plaridel Municipal Police Station, Provincial Drug Enforcement Unit (PDEU), Misamis Occidental Police Provincial Office (MOCPPO) ug Ozamiz Inteligence Unit.

Wala usab napasakitan nga sakop sa pulis atol sa maong operasyon.

Nasayran nga ang suspetsado Ang kanhi usab nabilanggo tungod sa kaso niini nga naglambigit sa illegal nga druga diin Siya nalakip sa target list sa PNP ug PDEA. (Lambo Misamisnon/PIA Misamis Occidental)