Oroquieta City nakatala ug usa ka kasong Malaria

Usa ka kasong imported malaria ang natala sa Barangay Mobod, Oroquieta City, human gi komperma ni Dr. Aljo Guantero ang City Health Officer sa Oroquieta City Health Office kon CHO, June 17,2022.

Kini ang gibutyag ni Oroquieta City Mayor Lemuel Meyrick M. Acosta atol sa iyang radio program nga Kita ang Oroquieta, June 18. Subay pa ni Mayor Acosta nga ang Oroquieta City gideklara nang Malaria free kaniadto, apan wala damha nga adunay imported nga Malaria ang naka sulod, human ang usa ka Overseas Filipino Worker kon OFW nga residente, naka uli gikan sa West Africa dili pa lamang dugay.

Matud pa nga ang maong OFW gilabdan sa ulo human siya nagpabakuna, mao nga nagtoo nga reaction lang kini sa bakuna, apan pag-abot sa tulo ka adlaw, nagpaadmit kini sa Misamis Occidental Provincial Hospital kon MOPH didto nahibaloan pinaagi sa gipahigayong test nga positibo kini sa sakit nga Malaria.

Matud pa ni Mayor Acosta nga daling gi-aksiyonan ni Dr. Guantero aron dili makakaylap ang sakit nga malaria sa dakbayan.

Nagpahigayon gilayon si Guantero ug mass testing sa Purok 4 Mobod sa 100 kapin ka mga residente aron masiguro nga dili makakaylap ang maong sakit. Nagpahigayon usab sa massive information drive ang CHO personnel ug labaw sa tanan gihimo ang search and destroy sa mga lamok nga maoy nag dala sa sakit nga Malaria nga makapaak sa tawo.

Hugot nga naghangyo si Mayor Acosta sa katawhan ilabina ang mga OFW nga nanguli nga gikan sa Malaria endemic nga nasud, nga mo pa test gayud sa CHO pag-abot para sa kasiguroan sa tanan.

Naglaum sad ang mayor nga masumpo ug dili na mo kuyanap pa sa syudad Kay peligro kini ug posibling mo kutlo kini ug kinabuhi sa tawo.(OCC/PIA Misamis Occidental)