Centenarian sa dakbayan, midawat sa P100k gikan sa LGU Ozamiz

Midawat ang centenarian nga si Lola Clemencia Oros Alvarico, sa P100,000 nga cash gift gikan sa LGU Ozamiz administration uban sa pagpanguna ni Mayor Sancho Fernando “Ando” Oaminal ug konseho sa dakbayan, adlaw nga Miyerkules Hunyo 1, 2022.(AONC)

Midawat ang centenarian nga si Lola Clemencia Oros Alvarico, sa P100,000 nga cash gift gikan sa LGU Ozamiz administration uban sa pagpanguna ni Mayor Sancho Fernando “Ando” Oaminal ug konseho sa dakbayan ubos sa pagdumala ni Vice Mayor Simplicia Neri, adlaw nga Miyerkules Hunyo 1, 2022.

Si Lola Clemencia nga taga-Purok Riverside, Brgy. Tinago ang mitungtong sa edad nga 100 niadtong Disyembre 4, 2020 ug mag-edad ug 102 sa bulan sa Disyembre ning tuiga. Natawo si Lola Clemencia sa Asturias, Cebu niadtong Disyembre 4, 1920.

Personal nga gihatod ni Vice Mayor Neri, Konsehal Cecil Co - Chairman sa Committee on Senior Citizens and Persons with Disability, City Social Welfare and Development Officer Marivic Kaamiño ug Tinago Barangay Captain Ricky Fuentes ang cheke nga nagkantidad ug P100,000.00 ngadto sa mismong panimalay sa centenarian nga naggikan sa lokal nga pangagamhanan sa dakbayan nga giduso pinaagi sa Resolution 106-2022 nga gipasa sa konseho.

Ubos sa Republic Act 10868 o ang Centenarians Act of 2016, ang mga senior citizens nga moabot sa edad nga usa ka gatos hatagan sa komendasyon ug makadawat sa P100,000.00 nga centenarian gift.

Bisan sa kataas sa iyang pangedaron, makita nga abtik ug lantip pa kaayo ang panghunahuna ni Lola Clemencia.

Mapasalamaton siya ug ang iyang pamilya sa cash gift nga nadawat ug pagtimbaya sa lokal nga mga opisyal sa dakbayan. Sumala pa ni lola, magamit gayod kini niya sa pagpalit sa iyang mga panginahanglanon.(AONC/PIA-10/Misamis Occidental)